Tevgera 1925an, Cemiyeta Azadî

PÊŞGOTINA ÇAPA DUYEM Tehsîn Sever 20.09.2017 Pêvajoya netewbûnê, di dîroka nêzîk de derkete holê û hê jî dewam dike. Li gel Şoreşa Fransî ya sala 1789’an, dewrekê nû destpê kir û wê dewrê bi xwe re rêxistinên civakî û sîyasî anîn. Ev, wek dewra netew-dewletbûnê jî tê binavkirin. Ji împaratorîyan derbasbûna netew-dewletbûnê gelekî bijan pêkhatîye. Çêbûna dewletên nû, bi xwe re pêkhatina maxdûrîyetên nû anîne. Mixabin, nifşên nû yên netew û civakên hatine mexdûr kirin, bi awayekê sererast nekarîne tiştên hatine serê mezinên wan hîn bibin, ango dîrok bi “adilane”nehatîye nivîsandin. Yên serdest, dîrok li gorî xwe guherandin. Ew dîroka hatî nivîsandin, wek îcadên serdestan “bêrehim”û “derexlaqî”ye. Wan ne bi tenê dîroka “xwe”fişalandin, herwiha wan dîroka mezlûman jî li gorê berjewendîyên dewletî kojandin û lê xebitîn vê yekê li milet bidin qebûl kirin.